لحظــة واحــــدة /أحمد توفيق

لحظــة واحــــدة..

كلمات عاميّة بقلمي/ أحمد توفيق

******************* 

لحظة واحدة واكون معاكي..

بس أخلّص الاتصال

فيه مكالمة عملها قلبك..

في كابينه واحد ع الشمال  

جريت أرد ع المكالمة..         

سَبَقني قلبي وراح في حال         

ماهو تاه وتاهت دقته..     

وتاهت معاه حروف الارتجال

***

لمّا تليفوني يرن بدقّتك..

يتوه لساني ولا طفل ضال

يضيع كلام كان فوق لساني..

كأني طفل تهدهديه برقة ودلال

صوته فيه طعم الأغاني..

ولحنه في غاية الجمال

لحظة واحدة واكون معاكي

بس أخلّص الاتصال

***

لحظة واحدة واكون معاكي..

نبض قلبك صوته عالي بدقته..

دقّه واحدة كفايه منه..

أسألِك.. مليون سؤال

والسؤال ياريته يخرج من لساني..

مرّه واحدة لو حتى طال

والقلب دقاته بتجري زي صيّاد..

طول عمره بيطارد غزال

***

ألمس السماعة كأني ماسِك كهربا..

كونتاكت والله والخط بيزيد اشتعال

صوت وصورة باحس بيكي..

قبل حتى ما يحصل اتصال

***

يرِّن قلبي ألف رنّة..

لما يسمع رنة واحدة بدَقِتك..       

وكأنه فاز بكنوز ومال

يجري نبضي يقول آلوووه..

يللي ع الخط: ردوا بالوصال

المكالمة تمنها عمري..

بس افتحي لي المجال

كل ثانية معاكي عمر...

وكل لحظة أعيش آمال

لحظه واحدة وأكون معاكيِ..

بس أخلّص الاتصال

***

لحظة واحدة وأكون معاكِي..

فيه مكالمة مهمة جايّه..

ما انا جوّة قلبي "سنترال"

مخصوص لهمسة من شفايفك..

تيجي في لحظات انتظار

الـ ألووه منك مُخدِّر..      

تحتلي نبضي بسلاح عبيرِك..     

أرضى منك كل أنواع الاحتلال            

***

المكالمة بنبضه واحده..

تنتهي عند الوصال 

والمكالمة التانية "نبضة"..    

تسرق الناحية الشمال

وكل نبضة تقول بحبك..

وكل دقة أكون في حال

لحظة واحدة خلاص راجع لك..

بس عاودي "بالكابينة" الاتصال

وافضل مستني المكالمة..  

وكأني مستني بوصالك: الهلال